Trataban os melidenses de gañar un título de honra: a vila coa maior tortilla española do mundo. E abofé que acadaron esta fin de semana o que con tanto afán perseguían. Todo, grazas a unha tortilla de seis metros de diámetro, 1.700 quilos de pataca, 30 quilos de sal, 300 litros de aceite e 15.000 ovos. Deste xeito a veciñanza elaborou o que buscaban con tanta ansia: a tortilla española máis grande. Unha circunstancia esta na que se involucraron bo número de veciños da vila da man de Ecocentro SC, empresa familiar melidense que comercializa un determinado tipo de ovo e que permitiu a esta histórica localidade coruñesa bater o récord Guinness no marco da I Feira Feira do Ovo Campeiro.
Segundo informaron os organizadores deste evento, a tortilla de Melide, pouco feita pero máis ca que de Betanzos, tiña bo sabor e “deixouse comer con apetito” ao dicir dun dos “probadores”. A expectación foi moi grande, tanta coma o tempo que botaron os “cociñeiros” na súa elaboración: catro horas.
A “tixola” empregada para facer esta “obra de arte” pesou 8.000 quilos, que houbo que voltear con moito esforzo e o tremor no corpo dos encargados de tamaño aparello e o máis de medio cento de persoas que contribuíron a facer realidade o que querían: unha tortilla de manda ovos que, a partir de agora, competirá coa rosquilla e o polbo á feira, referentes seculares deste municipio situado ao sur de Santiago de Compostela polo que transcorre o Camiño de Santiago e que foi fundado -polo menos así aparece documentado- no ano 1.140.
