Ribeira acolleu este 18 de setembro a presentación dun dos eventos deportivos máis populares da contorna e de Galicia; a XXV edición da Carreira Popular Santa Uxía 10K, que na convocatoria deste ano honrará o legado do deportista local Miguel Ruiz co seu I Memorial. Na presentación explicouse que Ruiz foi o gran impulsor desta cita a finais dos noventa do século pasado, gran impulsor do deporte en Ribeira cunha densa traxectoria como responsábel do departamento municipal de deportes.
Á presentación compareceron o concelleiro de Deportes, Xabier Vidal, o presidente da Asociación de Veciños de Carreira, Moncho Sampedro e os técnicos de deportes do Concello. Confirmaron que a Carreira Popular de Santa Uxía vaise celebrar o vindeiro sábado 28 de setembro e está encadrada no décimo circuíto das carreiras populares da Deputación e no sétimo circuíto da Mancomunidade Barbanza Arousa.
As probas comezarán partir das 17:00 h da tarde e contarase con 15 categorías dende nenos menores de seis anos ata a categoría máster catro que son os nados antes do 1964, e tamén se contará coa categoría de zapatilla inclusiva para persoas con diversidade funcional que xa é unha realidade en tódalas competicións de Galicia.
A loxística da carreira vai estar no Malecón, o circuíto (sub 18-máster 4) terá a saída no Mercado Municipal e transcorrerá polo litoral ata a Náutica Pesqueira onde se fará o xiro de volta. A meta estará instalada no Malecón á altura da Cruz Vermella.
Vidal aludiu á comprensión da veciñanza; “Pedir as desculpas aos usuarios dos vehículos polos cortes do tráfico que haberá un pouco antes do inicio da pobra e ata o final da mesma, a entrega de premios será sobre as 19.30 horas”.
Tamén quixo agradecer ao grupo de Emerxencias, á Policía Local e ao GAEM polo seu traballo e esforzo para que a carreira sexa unha realidade.
Pola outra banda Moncho Sampedro, impulsor do I Memorial a Miguel Ruiz, puxo en valor a súa figura como principal impulsor da carreira: “Foi o que sentou as bases para que esta cita sexa das máis importantes da tempada durante 25 anos”.
Toda a información da carreira está pendurada en Ribeira.gal no apartado de Deportes.
