En Ribeira, onde se localizada na actualidade a praza do Centenario, existiu até o actual século o campo da Feira, un recanto arborado de reunión veciñal, celebracións e lecer infantil que en verán, nestas datas, servía tamén como escenario de romarías e exaltacións gastronómicas.
Este domingo ás 13.30 horas o Concello queixo recuperar este espírito e incluíu no programa das Festas do Verán unha gran sardiñada na zona próxima das Avesadas, a onde se trasladou no seu día, coa construción da praza e do parque do Centenario, parte do arborado que existía no campo da Feira. A sardiñada resultou ser un éxito de participación, polo que todo indica a que se seguirá a recuperar esta tradición en vindeiras edicións das Festas. Acompañouse de música, con sesión vermú a cargo de Amores de Barra.
Previamente celebráronse na praza do Concello actividades para a rapazada, con inchábeis e xogos. Pola noite, na praza de España, volveu o Ribeira Urban Fest, con Juanma López, Rokiño, Silvia G, Dumore e Diego Tercero. A verbena nocturna contou coa presenza da Orquestra Platinum (ás 23h no Malecón). A xornada rematou ás 0.00 no paseo do Touro co tradicional combate naval pirotécnico e cos fogos de artificio.
Este luns 5 de agosto todas as atraccións de feira estarán a prezos populares.
