España vai á cabeza da UE en produción acuícola. Este é, ao mesmo tempo, o sector con maior proxección en España e avanza nos seus compromisos a prol dunha alimentación sustentable e de futuro, segundo consta na memoria de sostibilidade bienal que conforma o sector acuícola español adicado á produción sustentable de peixes e algas en mares e ríos.
En total, España produce o 81% do volume nacional de produción de peixe de acuicultura nos nosos mares e ríos, sendo os eixes do sector a economía circular, a innovación e a sustentabilidade.
A acuicultura preséntase coma unha solución rendible para garantir unha alimentación saudable procedente do medio mariño e dos ríos. Aporta valores nutricionais das proteínas animais sen esgotar os recursos naturais. O 50% dos españois consume, sen o saber, peixe procedente da acuicultura de orixe española. E para o ano 2050, o peixe representará o 25% da proteína necesaria para alimentar ao mundo, un crecemento que algunhas fontes estiman que só se pode asumir grazas á acuicultura e a súa aposta pola sustentabilidade.
A organización Acuicultura de España coida que este sector é a fonte de ingresos para milleiros de familias de tradición pesqueira. En ningún caso se cita ao sector pesqueiro que, en Galicia, multiplica por moitos enteiros ao da acuicultura e aporta á economía desta comunidade un PIB que, nin de lonxe, acada o acuícola. A este é o cultivo mexilloeiro o que máis rendibilidade produce. E no que atinxe á man de obra, o sector da pesca extractiva en practicamente todos mares do mundo realizada por barcos e mariñeiros galegos, multiplica a día de hoxe o que a acuicultura aporta a ese Produto Interior Bruto (PBI) anteriormente citado. Tendo perdido moito Galicia nos derradeiros anos da súa produción pesqueira e marisqueira, o certo é que estabelecer comparanzas entre a acuicultura e a pesca mariña é un disparate, se mire por onde se mire. E no aspecto socioeconómico resulta incuestionable a preponderancia do sector pesqueiro. Talvez sexa hora de lle dar a este o valor que lle corresponde e non centrarse exclusivamente en enxalzar a unha acuicultura que, sendo importante en esencia, hoxe en día non pode arrombar ao seu sector pesqueiro, que da emprego -segundo fontes da Consellería do Mar- a 50.000 persoas, o 50% do emprego marítimo-pesqueiro de España. Só no Réxime Especial de Traballadores do Mar, Galicia é a comunidade que máis afiliados rexistrou, de media, no que vai de 2024.
A principios deste ano, a frota pesqueira galega totabiliza 4.000 barcos, a maioría deles faenando no caladoiro Cantábrico-Noroeste.
