Este mércores 14 de agosto a praia de Barraña vai ser o escenario da estrea en Boiro de De Vilatriste a Vilalegre, de Teatro ó Cubo. Será ás 12.00 horas. Trátase dun espectáculo para todos públicos co-producido polo Centro Dramático Galego, no marco das celebracións do seu 40 aniversario.
Ficha
Texto orixinal de Roi Vidal Ponte. Direccion: Sofía Espiñeira López e Roberto Casal Mouriño. Elenco: Uxía Algarra Cajide e Roberto Casal Mouriño. Escenografía: Beatriz de Vega. Vestiario: Carmen Pichel. Música: Brais das Hortas
Teatro de monicreques | Para tódolos públicos | Duración aprox.: 60 min.
Sinopse
Nos arredores de Vilatriste hai unha lagoa da que emana unha néboa misteriosa que impregna o aire cunha estraña tristeza. Uns novos moradores descobren que se beben das súas augas adquiren un superpoder que os dota de capacidades extraordinarias. Pero as xentes de Vilatriste ignoran todos estes efectos. Cando estes forasteiros tentan compartir o seu achado atópanse de fronte coa desconfianza e rexeitamento dos veciños.
A morte do alcalde vello e a chegada do novo traen consigo toda unha serie de transformacións cunhas escuras intencións. Trepas é o alcume dun novo habitante de Vilatriste enredado inesperadamente nunha singular aventura: salvar a vila das fauces dun malvado dirixente. Axudado por unha singular superheroína descobren a fórmula para vencer ao seu inimigo pero… funcionará?
