A Áre de Benestar Animal do Concello de Ribeira organiza este sábado 31 de agosto, a partir das 21.00 horas en en colaboración con Callejeros Barbanza e Musieventos, un concerto solidario para concienciar á veciñanza e para recadar fondos para o coidado das colonias felinas. Este martes 27 a concelleira de Benestar Animal, Antía Alberte presentou esta nova iniciativa. Comunicou que dende o seu departamento estase a traballar arreo en liquidar toda a problemática xerada co tema das colonias felinas.
Alberte informou que “o maior problema ao que nos enfrontamos en materia de benestar animal é no relativo ás colonias felinas”. Os gatos, dixo, teñen unha taxa de reprodución máis rápida, hai moitos focos que abordar ao longo das parroquias e tamén en Ribeira. Engadiu que “é certo que este ano estivemos esterilizando moitas das colonias, tamén estivemos facendo un curso de formación de alimentadores e obradoiros; eses alimentadores están en contacto directo ca Concellería para o traslado de alimentos e posúen un carné de alimentador que os ampara de cara a problemas veciñais que podan ter”.
O obxectivo da Concellería é seguir esterilizando e solucionando os problemas para que as colonias cheguen a unha estabilidade: “Para que a colonia chegue a ser unha auténtica colonia, e non unha praga que é o que está acontecendo, precisamos de primeiras unha boa praxe e precisamos que a veciñanza teña conciencia de castrar aos gatos cando se debe para que isto non acabe sendo un problema coma o que estamos vendo agora”.
Antía deu as grazas ao labor que están a facer dende Callejeros Barbanza, que, dixo, “é a principal entidade que está axudando á Concellería para a captura dos gatos das colonias”. Falou da necesidade de recadar cartos para seguir desenvolvendo estas accións e tamén da concienciación cidadá que formará parte de este evento cun coloquio a partires das 21.30 h do vindeiro sábado.
Tamén haberá un concerto de Sinverjuergas e unha sesión de DJ Antón, todo isto amplificado cun Musieventos que xunto cos artistas colaboran de forma desinteresada.
A conselleira animou á veciñanza a participar e a involucrarse xa que é un problema que “temos que afrontar entres todos/as”, engadiu.
