Este verán, o 10 de agosto, volve a feira de vinilos de Ribeira, Xiradiscos, e faino novamente con venda de discos, concertos e actividades para a rapazada. A gran novidade deste ano é o cambio de localización, que pasa da praza de Vigo á Porta do Sol. O programa inclúe un mercadiño de vinilos durante toda a xornada, unha sesión vermú con DJ Nell e concertos pola noite: Tu Futura Ex Mujer (banda de indie-garage de Carballo, embarcada na presentación do seu disco Novos Millonarios) e Candy’s Freckles (representantes do emerxente panorama da música alternativa galega, da man de @radixrecords). Previamente, ás 21.00, contarase coa presenza do mago Henriko O Feiticeiro. A feira rematará con Toño Ferreirós e Nell novamente.
Xiradiscos vén da man do Smart Studio de Nell Martínez e o selo discográfico local Radix Records, co apoio do Concello e dunha manchea de firmas locais patrocinadoras.
Temos máis información en xiradiscos.com.
Tu Futura Ex Mujer
A banda Tu Futura Ex Mujer está formada por 4 amigos de toda a vida (Haime, Manu, Dany e Bryan) onde todos contan cunha ampla experiencia na industria musical. Son un grupo de indie-garage que ofrece un son movido con melodías psicodélicas, con letras tanto tristes como cheas de retranca, soando “nostálxicos pero modernos”, adiantan.
Fundada en Carballo, a banda leva en activo dende o verán de 2020, “cando non se podía baixar a beber aos bares e había que facelo na casa”. Haime, cheo de raiba e frustración que necesita soltar, compra unha tarxeta de son e un micro barato e empeza a gravar as primeiras demos mentres aprende a mesturar.
Publican o primeiro single, Lo intentamos, en 2020. Dende aquelas levan publicados 6 singles e un EP homónimo totalmente gravado e editado con medios precarios por Haime, o vocalista. En novembro de 2022 lanzan o primeiro adianto do seu primeiro álbum, Novos Millonarios, gravado e mesturado por Julián Goikoa (baixista en Mundo Prestigio e Carlangas y Los Cubatas) que sae a principios de 2023.
Candy´s Freckles
Candy’s Freckles son una banda emerxente da música alternativa galega que chega a nós da man do selo ribeirense @radixrecords. Autodenominados como indie psicodélico, ofrecen un son único froito da inspiración de diversos estilos como son o rock, o jazz, a bossa nova, o lounge e incluso math rock, estilos aplicados a unha esencia de banda de rock alternativa dos 90.
Teñen gravados varios singles e EPs (dous deles publicados por Radix Records, Love e The Sound of a Glass of Wine Falling on a Persian Carpet) e en datas vindeiras sacarán o seu álbum debut da man do selo discográfico ribeirense.
