A deputada de Vías e Obras da Deputación da Coruña, Mónica Rodríguez, visitou o Concello de Muros o pasado mes de decembro e nun encontro coa alcaldesa, María Lago, e a tenenta de alcaldesa, Caridad González, comprometeuse a instalar unhas biondas de seguridade (valados metálicos de protección con feitura de dobre onda, de aí o seu nome) na estrada que forma parte do circuíto das carrilanas de Esteiro.
Desde o Concello realizáronse as xestións necesarias para que a Deputación executase a actuación antes das carrilanas, tal e como se pode comprobar nas imaxes que acompañamos.
“Trátase dunha demanda histórica por parte da asociación organizadora das carrilanas e unha moi boa nova para todo o concello, xa que aumenta de forma considerábel a seguridade na estrada”, sinalou a rexedora María Lago.
O Gran Prix de Carrilanas celébrase esta fin de semana, organizado pola Asociación das Carrilanas de Esteiro coa colaboración do Concello de Muros.
