O Concello de Boiro achegou un balance dos traballos desenvolvidos para rehabilitar a capela do Pazo de Goiáns impulsadas pola Administración local grazas ao co-financiamento da Deputación da Coruña, obras que, segundo o equipo de Goberno, avanzan a bo ritmo. O alcalde, José Ramón Romero, e o concelleiro de Urbanismo e Obras, Luís Ruiz, supervisaron na mañá deste martes 23 de xullo a execución dos traballos.
Lembraron que o Pazo de Goiáns é unha antiga fortaleza medieval, situada nun entorno inigualábel ao pé do esteiro do río Coroño, cun edificio principal e unha torre rehabilitadas no ano 2022, ao que se sumou o acondicionamento dos espazos naturais de gran valor que forman parte da propiedade do pazo. Porén, era materia pendente frear o proceso de deterioro da capela e recuperala, sinalaron.
As actuacións que se están a levar a cabo ascenden aos 110.133,81 euros e contemplan a consolidación, sen alterar a estética, dos restos que se conservan integramente; rehabilitar a cuberta, os muros e as carpinterías; e a instalación de nova iluminación. “Con estas actuación seguimos avanzando na rehabilitación dos edificios auxiliares ao Pazo de Goiáns, unha das nosas xoias arquitectónicas e xa emblema turístico do municipio”, afirmou o concelleiro de Urbanismo e Obras, Luís Ruiz.
Ademais das actuacións da capela, estanse a executar as obras para a mellora ambiental no estuario do río Coroño, unhas actuacións que ascenden a un total de 204.024 euros e que axudan a conectar o Pazo co núcleo urbano, mellorando a súa accesibilidade e dándolle un valor engadido á súa contorna natural. “Avanzamos na rehabilitación integral da mellora do Pazo e da finca para chegar a rehabilitar todas as edificacións auxiliares”, afirmou o alcalde José Ramón Romero.
Para frear o deterioro das edificacións o Concello de Boiro encargou proxectos de rehabilitación co obxecto de dar solución ao estado de ruína das edificacións e, para a execución dos proxectos vaise concorrer a unha liña de axudas da Consellería de Infraestruturas, a través de préstamos sen intereses, para a rehabilitación de inmóbeis.
