A vítima mortal, un varón duns 75 anos, estaba de veraneo na vila coa súa familia. O accidente sucedeu na Avenida Rosalía de Castro, na recta de Carril, nun paso de peóns con regulación semafórica.
Un helicóptero medicalizado desprazouse ata o lugar dos feitos, sen embargo, nada se puido facer por salvarlle a vida.
Eran as 11:40 horas desta mañá cando o 112 Galicia tivo constancia do suceso. Un alertador daba conta dun atropelo a unha persoa de avanzada idade na PO-548, á altura do número 78, na recta de Carril, no termo municipal de Vilagarcía de Arousa. Aseguraba que estaba totalmente accesible pero que asemellaba estar ferida de consideración.
De inmediato, os xestores do Centro Integrado de Atención ás Emerxencias 112 Galicia puxeron os feitos en coñecemento do persoal do Servizo de Urxencias Sanitarias de Galicia-061, que derivou ao punto o helicóptero medicalizado con base en Santiago de Compostela. De igual xeito, foron informados os Bombeiros de Vilagarcía, os axentes da Policía Local e os efectivos do Servizo Municipal de Emerxencias da localidade.
Con todo, unha vez no lugar, os profesionais sanitarios tan só puideron certificar o falecemento da persoa
