A empresa alimentaria ACTEMSA, emprazada na Pobra (no Polígono da Tomada) e dirixida á distribución e exportación dos nosos produtos pesqueiros, vén de dar por zanxada a situación delicada pola que pasou neste período post-COVID e aprobou un plan de reestruturación (protocolado o pasado 9 de xullo ante notario) e un modelo de negocio viábel e garantíbel para os vindeiros dez anos.
Segundo informou a empresa nun comunicado, o plan garante o mantemento da actividade empresarial e da totalidade dos postos de traballo, máis de 200 traballadores, aínda que se espera a incorporación de 30 máis nos próximos días por necesidades da produción. Igualmente, a folla de ruta implica a reestruturación financeira total da débeda. Unha gran maioría do pasivo aceptou o plan de reestruturación.
Ademais, coa posíbel incorporación de Xesgalicia como investidor institucional e a aprobación final do xulgado mercantil, ACTEMSA dá por superada a crise ocasionada polo afundimento dos mercados pesqueiros, o que significou a caída de moitos operadores globais; dá as grazas ás entidades financeiras, aos seus provedores estratéxicos, os grupos JEALSA e Albacora e a todos os acredores e provedores; “para encarar o futuro con optimismo”, informaron fontes da dirección da empresa pobrense.
