O monte de Filghueiras (Taragoña, Rianxo) acolle este sábado 15 de xuño a terceira edición da Romaría das Fousas, unha celebración cultural, saudábel e ambiental que xunta deporte, música e faladoiros nun único escenario, todo co obxectivo de “desfrutar dunha xornada festiva e reinvindicativa no noso monte”.
Este evento é organizado polo Movemento Veciñal Fousas ao Monte, coa colaboración do Concello de Rianxo, Quinteiro Doce, Fesba e O Curral do Marqués.
As actividades no monte Filgheiras comezarán ás 11.00 da mañá, cun biathlón de toxeira e xogos populares, seguido dun faladoiro medioambiental ás 12.00 horas. Ás 13.00 horas dará comezo a charanga a cargo de Guarimaná, e ás 14.00 será a quenda das picadiscos Maruxa e Coralia. Logo será a hora do xantar popular con churrasco e hamburguesas premium low cost.
Pola tarde, celebrarase ás 16.00 horas un obradoiro de trepa e tirolina, e ás 17.00 está programado un concurso e un bingo musical.
Ás 18.00 actuará o DJ Bañu Txeku.
Ás 19.00 a xornada terá un dos seus intres álxidos cos concertos de Pecha A Cansela e Ulex.
A xolda festeira terá o seu broche de ouro ás 21.00 horas con Estaka Dillei’s.
