Dende o clásico “pezqueñines no, gracias” dos anos 80 do sèculo pasado, a outras campañas de corte semellante desenvolvidas polo Ministerio de Agricultura, Pesca e Alimentación, os distintos gobernos españois nunca apoiaron con convencemento ao sector pesqueiro, limitándose cada ano ao consabido comentario relativo ao resultado do tradicional Consello de Ministros de Agricultura e Pesca da UE que sempre se valorou positivamente dadas as previsións que se facian en relación cos TAC e cotas correspondentes ao ano novo.
“España acada un bo resultado”, “O potencial pesqueiro español, recoñecido nas novas cotas de pesca da UE”, e titulares semellantes para limar as asperezas emanadas do sector da pesca no que se evidenciaba constantemente que o parque do Retiro non tiña -nen ten- mar e si unha ben fermosa lagoa moi arborada.
Tampouco agora, hoxe en día, o goberno que preside Pedro Sánchez, amosa unha mínima sensibilidade cara un sector, o pescador, marisqueiro e conserveiro que, amáis de dar traballo a milleiros de homes e mulleres en todo o bordo litoral (7.905 quilómetros) incide en 10 comunidades autónomas, dúas cidades autónomas, 25 provincias e 428 municipios. A poboación total ocupada na pesca e a acuicultura españolas supera escasamente as 39.000 persoas, ás que -para sermos xustos- compre sumar un mínimo, en Galicia, de seis mil mulleres que desempeñan o seu labor nas fábricas de conserva, e outras tantas no subsector do marisqueo, asimesmo en Galicia.
Con estos datos riba da mesa non se pode calar a decepción coa que o sector pesqueiro ven de acoller a non inclusión dos produtos da pesca entre aqueles alimentos aos que nin se lles vai aplicar o Imposto sobre o Valor Engadido (IVE).
Os produtgos do mar, ao igual que as conservas de peixe e marisco, semellan non gozar da atención do Goberno no que atinxe á súa promoción para o consumo, como tampouco a ten para a aplicación das rebaixas fiscais que sí se verán aplicadas noutros alimentos que nada teñen que ver co sector marítimo-pesqueiro por máis valor nutritivo que teñan (como tamén o teñen o peixe, as conservas e o marisco). A este sector aplícaselle un IVE do 10%, mentres que os outros -como os do pan, as patacas, o leite, as verduras e froitas, etc.- ese IVE ten, cando non unha rebaixa total, sí a do 4%.
Por que os alimentos que proceden do mar -demostrado o seu valor nutritivo- non se beneficia dos mesmos códigos que son de aplicación no sector agroalimentario?. É que, acaso, non son alimentos saudables ao tempo que de alta demanda polos cidadáns españois?, xa non hai aposta favorable do Goberno a prol da inxesta de peixe?.
