Incontestable: cando aínda queda máis dun mes para a final olímpica de París 2024, a ribeirense Ana Peleteiro festexa coa súa familia os 14,85 metros acadados en triplo salto a pasada fin de semana, en Roma. Todo aberto, máximo após este trunfo europeo.
Foi un estourido de felicidade o que percorreu -e aínda percorre- Galicia e España enteira, de xeito sumamente especial a comarca do Barbanza, nomeadamente o concello de Ribeira onde as augas da ría de Arousa revitalizan a Ana e os seus: Benjamín Campoare, o seu marido (e coma ela, tamén atleta) e Lúa, a filla de ambos os dous que xa vai camiño dos dous aniños.
No amplo historial atlético de Ana Peleteiro hai unha aposta clara que a atleta ribeirense foi cubrindo etapa a etapa con catorce campionatos de España -aire libre e pista cuberta- aos que debemos sumar un mundial en pista cuberta e o europeo de 2018, europeos tamén en pista cuberta de 2019 e 2021, o olímpico deste mesmo ano 2021, o mundial de 2024 en pista cuberta e o europeo deste mesmo ano que sinalan a historia.
A atleta olímpica de Barbantia, coa súa parella Benjamín e a filla de ambos os dous, Lúa, celebraron xuntos e de xeito especial, esta nova fazaña de Ana Peleteiro. Foi, segundo recollen distintos medios de comunicación, “unha das noites máis especiais da miña vida. Grazas Roma, pero sobre todo grazas a todos os que sempre estades ao meu carón. Isto só é o principio”, dixo unha Ana que debe ter motivos para o aseverar xusto cando unha outra vez fai historia aos poucos meses de acadar o podio máis alto no terceiro Campionato Mundial de Atletismo en Pista Cuberta de 2024, en Roma. Unha presea que abre todas as posibilidades para os Xogos Olímpicos de xullo e agosto na capital de Francia, con posibilidades de se facer co seu primeiro ouro mundial en triplo salto. E a só dous centímetros de bater o seu propio récord nacional de España: 14,87 metros.
Forza, Ana!!.
