A Asociación Rianxeira de Empresarios (ARE) celebra este venres 28, de 19:00 a 22:00 horas, a súa campaña Xa é verán!, iniciativa que ten o obxectivo de “dinamizar o comercio e a hostalería locais, coincidindo coas rebaixas de verán, e está co-financiamento da Xunta de Galicia”. Durante toda a xornada, os establecementos participantes agasallarán aos seus clientes bolsas reutilizábeis personalizadas co lema Fas latexar o noso corazón coas túas compras. “Esta acción non só fomenta o consumo local, senón que tamén promove a sustentabilidade mediante o uso de bolsas sustentábeis”, sinalou a patronal rianxeira.
Para a rapazada… e para maiores
Para os máis pequenos, a diversión está garantida con inchábeis (Campo de Arriba) e obradoiros lúdico-educativos (Xardíns da Martela).
Ademais, a campaña incluirá un divertido photocall de verán onde todas as persoas asistentes poderán facerse fotos e compartilas nas redes sociais co cancelo #xaeveran24. A foto que reciba máis reaccións será recompensada cun agasallo especial. Estará instalado xuntos cos obadoiros lúdico-educativos.
E para rematar a festa, a partires das 21:00 horas na rúa Gudiños, actuación de Martín Reimúndez e José Manuel (Orquesta Abanico) patrocinada por Bar A Roda, Bar O Costillar, Cafetería Saraiba e Toskana.
Segundo explican dende a ARE, “Xa é verán! non só é unha oportunidade para gozar dunha xornada de compras e actividades, senón tamén para apoiar o comercio local e a hostalería de Rianxo”. Estes sectores, engaden, “son fundamentais para a economía da nosa vila, creando emprego e fomentando o desenvolvemento económico e social”.
A ARE convida a toda a veciñanza a participar desta xornada, a “descubrir a ampla e variada oferta dos nosos comercios e a gozar das actividades programadas; é un momento perfecto para apoiar aos nosos comerciantes e hostaleiros, quen día a día traballan para ofrecer os mellores produtos e servizos”.
