Este sábado disputouse a primeira xornada da XXIV Regata Ramiro Carregal Rey, o Gran Trofeo Faro de Corrubedo que organiza o Real Club Náutico de Portosín en colaboración co Náutico Deportivo de Riveira e a Real Federación Galega de Vela.
Proba de travesía, que uniu as dúas rías, a de Muros e Noia e a de Arousa, cun percorrido costeiro de 22 millas náuticas que se completaron en pouco máis de catro horas, todo iso grazas a unha compoñente meteorolóxica que asistiu á organización chegando do suroeste xusto á hora da saída, que foi as 12 do mediodía.
Á convocatoria asistiron 22 veleiros, representantes de entidades náuticas galegas que están a participar na competición que alberga o Campionato Galego de Cruceiros e a Copa de Galicia Zona Norte, por ser puntuable.
Gran regata do barco local de Portosín, o Siradella, de Francisco Gude e César Álvarez, que dominou a manga de principio a fin, aínda cando non llo puxeron fácil nin o Corsario, de Jorge Durán, do Club de Iates de Vilagarcía, nin o Bon III, de Víctor Carrión, do Club Náutico Punta Lagoa.
Vento algo variable no seu eixo de dirección, que rolaba desde o 240 ao 270, é dicir, de Suroeste a Oeste, e onda de mar de fondo con certa altura desde Corrubedo ata Sagres.
Gran destreza do Siradella, que lidera tamén a División Regata, seguido de Youkounkoun, de Adolfo Castro, do Club Náutico de Portonovo,
e o propio Bon III.
Nos Cruceiro-Regata, o cetro provisional é para o Orión, de Alberto Pérez, do Monte Real Club de Iates de Bayona, coa prata para o Ziralla Primeiro, de Ramón Barreiro, do Ro Yacht Club e o bronce para o Exit Manitú, de Emilio Lago, do Liceo Marítimo de Bouzas.
E, por último, nos Cruceiro, mandato do Galopín, de Manuel Franco, do Náutico de Riveira. Séguelle o Cámping Ría de Arousa, de José
Manuel Pombar, do Club Náutico Arousa Norte. E pecha o podio o A Píllara, de Iago Ben, do Club de Riveira.
O domingo disputarase, polo menos, unha manga técnica tipo barlovento-sotavento, sendo intención do Comité da Ramiro Carregal
Rey o incluír unha segunda proba, todas elas no interior da Ría de Arousa.
Ao seu termo celebrarase a entrega de premios coa asistencia confirmada en Riveira de Ramiro Carregal. (Juan Caballero)
