Esta fin de semana a Corporación local de Outes formalizou a declaración do mestre, músico e dinamizador cultural Domingo Barreiros Lago como Fillo Predilecto do concello, en recoñecemento “á súa traxectoria para a promoción musical, cultural e educativa do municipio”.
O acto solemne celebrouse estes sábado 4 de maio con formato de pleno extraordinario aberto a toda a cidadanía, na Casa da Cultura. O acto arrincou con música a cargo da Coral Francisco Añón, que foi no seu día dirixida por Barreiros Lago. No transcurso da homenaxe, a Corporación gabou o seu importante legado nos eidos educativo e musical, e recordou a fonda pegada deixada na súa traxectoria como docente nos colexios do Freixo e O Cruceiro, así como no IES da Serra da Outes. O rexedor, Manuel González, salientou a súa importante contribución á cultura local. As corais que dirixiu no concello de Outes pero tamén en Noia, Porto do Son e Muros fixéronlle entrega da placa conmemorativa.
Domingo Barreiros Lago naceu na parroquia de Louro (Muros), en 1942. Foi, na súa nenez e mocidade, alumno da Escola de Abaixo e posteriormente do Seminario de Herbón onde cursou o Bacharelato. Matriculouse no ano 60 por libre na Escola de Maxisterio de Santiago e logo opositou para unha praza de mestre nacional no 63, exercendo en Outes, Noia, Carnota e Sobrado dos Montes. Foi mestre propietario durante anos dunha escola de nenos no Freixo (Outes) e outros colexios da contorna, vertente que compaxinou coa súa faceta de músico, que materializou como membro da Orquestra Los Romero e, tamén, como director das corais Orfeón Ría de Muros, Coral “Agustín González” de Louro; Clube de Xubilados de Porto do Son, Liceo de Noia e “Francisco Añón” de Outes; Coral “Don Diego de Muros” e “San Xoán de Serres” e Coral Xuvenil “Solpor de O Freixo”.
