O Museo do Gravado de Artes (Ribeira) vai inaugurar este venres 31 de maio unha nova exposición, na sala 1 a partir das 12.30 horas. Trátase da mostra Os Monos de Laxeiro. Obra humorística na prensa, procedente dos fondos da Fundación Laxeiro de Vigo e froito da colaboración entre esta entidade e a Fundación Museo de Artes do Gravado.
Participarán na inauguración o alcalde de Ribeira, Luís Pérez Barral, e o director do Museo do Gravado, Pastor Rodríguez.
Tamén está previsto que asista o alcalde de Vigo, Abel Caballero e o director artístico da Fundación Laxeiro, Javier Pérez Buján, entre outras autoridades.
A Fundación Laxeiro presenta unha proposta na que, por vez primeira, pódense ver todas as viñetas humorísticas que Laxeiro publicou na prensa, en concreto nos xornais El Pueblo Gallego e Faro de Vigo, nos anos 1928, 1929 e 1930. Segundo as entidades impulsoras da mostra, esta é un acontecemento cultural de primeira orde, xa que nunca antes se vira este interesante traballo de Laxeiro na súa totalidade. Co gallo da exposición a editorial Laiovento publica o libro homónimo, no que reproduce a totalidade das viñetas (corenta e nove) acompañadas ademais con textos asinados por Manuel Igrexas, Félix Caballero e Javier Pérez Buján.
