O Concello de Boiro, xunto coa Asociación Cultural Barbantia, organizan o venres 17 de maio a XIII Romaría das Letras que terá lugar no Pazo de Goiáns.
O Concello e Barbantia comunicaron este 15 de maio que foi necesario introducir unha serie de cambios no programa por mor das condicións climáticas adversas. En termos xerais, a actividade trasladarase ao interior do Pazo, onde se realizará a feira de artesanía e literaria, o fotocol con roupa tradicional, a exposición dedicada a Luisa Villalta e o obradoiro de ourivería. Tamén se levarán a cabo no interior os concertos de Alana e Os Melidaos e as presentacións literarias.
Ás 11.30 horas dará comezo o programa coa apertura do recinto da Romaría. As 12.00 horas abrirá a feira artesá e literaria; o fotocol con roupa tradicional cortesía da asociación Xilbarbeira; unha exposición dedicada a Luisa Villalta, autora homenaxeada nas Letras Galegas 2024; e un obradoiro de ourivería con Susi Gesto.
Ás 12.30 horas desenvolverase un roteiro botánico pola leira do Pazo a cargo de Xulio Gutiérrez Roger e ás 13.30 horas haberá no interior do edificio unha actuación de Alana Trío.
O xantar popular está previsto para as 14.30 horas.
A programación de tarde comezará ás 16.00 horas co acto institucional seguido das presentacións literarias de Carme e a serea Mariña de Ana Rial cun paseo teatralizado con Marta Ríos. Ester F. Carrodeguas presentará Iribarne; e Beatriz Maceira, Eli Ríos e Laura Suárez presentarán a publicación Alma de violino.
As 19.00 horas dará comezo un concerto de Os Melidaos e ás 22.00 horas está previsto o remate da XIII Romaría das Letras no Barbanza.
