O Teatro Colón acolleu este mércores 15 de maio a Gala das Letras Galegas da Deputación da Coruña, organizada pola Área de Lingua da entidade provincial. Foi en termos xerais unha homenaxe á poeta coruñesa Luísa Villalta a través dun espectáculo poético e musical inspirado en A Música Reservada, o seu primeiro libro de poemas publicado. A deputada de Lingua, a outense Soledad Agra, foi a encargada de abrir un evento diverso e multidisciplinar que enxalzou a poeta como “unha artista que cultivou múltiples artes e en todas elas destacou: violinista incríbel, poeta premiada, ensaísta, dramaturga, filóloga…”.
Soledad Agra salientou tamén o feito de que Luísa Villalta “é unicamente a sexta muller homenaxeada nos 61 anos de historia do Día Das Letras Galegas”, e rematou a súa intervención cunha invitación a “formar parte”, parafraseando á homenaxeada.
As poetas Yolanda Castaño e Dores Tembrás foron as encargadas de conducir o acto, comezando cunha invitación a desfrutar “deste espectáculo de sensacións sonoras e visuais para transmitir o universo da artista” e deron paso, dende a poesía, a cada unha das actuacións, coa posterior revelación de que “imos contar, por primeira vez, a verdade”.
Actuacións que comezaron coas oito mans e as voces de Lulavai, e continuaron coa performance de Eva Vieites, que apareceu por un lateral do patio de butacas para sorprender cunha voz cativadora expresando poesía e “verdade”.
Ao rematar, polo outro lateral chegaba a bailarina Janet Novás que, en palabras de Yolanda Castaño “tomou corpo e prodixio” para revelar un cúmulo de sensacións diversas e auténticas. Tras ela, os pulsos dos nenos e nenas da Orquestra Infantil da Sinfónica de Galicia interpretaron unha sinfonía de Bach cos seus “violinos” e, despois, encheu o silencio do Colón a voz da soprano Adriana Aranda coa composición de Hugo Gómez-Chao. Pechou o acto Mercedes Peón, acompañada do violín de Elena Vázquez Ledo, cun espectáculo híbrido de voz, sons tradicionais galegos e as cordas do “violino”.
A imaxe e o deseño de luces, de Xurxo Gómez-Chao e Dani Pais, respectivamente, tamén adquiriron unha nova dimensión, integrándose nesta gala multisensorial e performativa protagonizada pola obra e figura de Villalta.
Esta homenaxe forma parte de toda a programación que a entidade provincial levará a cabo no marco do Día das Letras Galegas, e que é “moi completa, como Luísa Villalta”, apuntou a deputada de lingua, Soledad Agra. “Unha autora que se revela contra os ditados sociais impostos no seu nacemento: na lingua, na poesía, na música, no activismo social e tamén na militancia política”.
