Expertos no ámbito da dependencia de España e Italia congregáronse este 16 de abril en Rianxo para abordar novas metodoloxías na Formación Profesional e o acompañamento de persoas dependentes.
A primeira sesión deste Encontro Transnacional Erasmus Care4You, liderado polo IES Félix Muriel, coa Asociación AGADEA Alzhéimer e a entidade italiana Mestieri Lombardía, representou un novo e importante avance na procura de solucións innovadoras para a formación dos profesionais de atención a persoas con dependencia.
O encontro foi inaugurado polo director xeral de Maiores e Atención Sociosanitaria da Xunta, Antón Acevedo, e contou coa asistencia do alcalde de Rianxo, Julián Bustelo, e o concelleiro de Política Social de Boiro, Raúl Treus.
Ante un numeroso público, formado por estudantes, entidades sociais, profesionais e familias, o director do IES Félix Muriel, Ramón Veiga, destacou a necesidade de “desenvolver novas habilidades no eido da atención a persoas en situación de dependencia”. Así puxo en valor a nova figura profesional do “auxiliar co-terapeuta”, que centrou boa parte da xornada, e que pretende completar a formación dos coidadores e coidadoras, poñendo especial énfase na importancia dos coidados especializados.
Isabel Gey, presidenta de AGADEA, e Stefano Radaelli, de Mestieri Lombardia, coincidiron na importancia de identificar as necesidades dos futuros profesionais do sector para proporcionarlles unha formación axeitada e centrada nas necesidades das persoas dependentes.
No encontro tamén participou o científico Carlos Spuch, investigador R4 do Grupo de Neurociencia Traslacional no Instituto de Investigación Sanitaria Galicia Sur (IISGS) co relatorio Novas fronteiras na enfermidade de alzhéimer, na cal ofreceu unha visión sobre o progreso e os desafíos na investigación desta doenza. Spuch subliñou un fito recente no eido da neurociencia: a aprobación por parte da FDA dos primeiros fármacos para tratar a enfermidade do alzhéimer nas súas fases temperás. Este logro, dixo, é o resultado de anos de avances científicos que “abriron novas vías de investigación” e permitiron unha “comprensión máis profunda da doenza”, explicou.
O doutor Spuch sinalou que “aínda que estes avances son prometedores, queda moito traballo por facer para garantir que os tratamentos cheguen a todas as persoas afectadas”, apuntou, engadindo que “nos vindeiros anos abrirase unha pequena esperanza para tratar esta terríbel enfermidade, pero para que cheguen a todas as persoas necesitaranse de moita investigación que forme á sociedade e predicir cal será o mellor fármaco para cada unha”, asegurou.
O encontro concluíu coa intervención do director técnico da Fundación Estel de Llevant, quen compartiu o Modelo de 3 Salut Mental: Os dereitos e as persoas no centro, salientando o a importancia de poñer ás persoas no centro dos coidados e garantir os seus dereitos no ámbito da saúde mental.
Julián Bustelo salienta unha atención de calidade
Na xornada participaron tamén o rexedor rianxeiro, Julián Bustelo, e o director xeral de Maiores da Xunta, Antón Acevedo.
O alcalde destacou a misión das administracións públicas en canto ao fortalecemento da formación e dos servizos no ámbito sociosanitario, “para blindar, neste mundo plural e envellecido, unha atención de calidade que responda ás necesidades complexas e diversas das persoas ás que servimos”. Lembrou ademais que dende o Executivo rianxeiro véñense impulsando nos últimos meses diferentes servizos neste ámbito: “Así, da man de AGADEA, púxose en marcha un centro terapéutico para persoas con alzhéimer, así como un programa de envellecemento activo que se prevé ampliar proximamente”.
