Na mañá deste 20 de marzo, o conselleiro do Mar en funcións, Alfonso Villares, visitaba as instalacións de Conserva Cortizo en Rianxo e aproveitaba para louvar ao sector conserveiro galego como motor económico e fonte de emprego de calidade así como a súa capacidade exportadora. Villares quixo tamén salientar a traxectoria desta empresa familiar “baseada no uso dunha excelente materia” e o coidado da mesma durante o proceso de elaboración artesanal e tradicional dos seus produtos para achegar aos consumidores o mellor sabor dos nosos mares.
O responsábel autonómico subliñou que grazas ao traballo de empresas como Conservas Cortizo “a nosa comunidade mantén o liderado nacional na elaboración destes produtos acaparando o 75% da produción e o 69% da facturación que ronda os 900 millóns de euros anuais”. Tamén sinalou a capacidade exportadora do sector levando os seus produtos a 130 países o que demostra o recoñecemento da calidade e sabor da conserva galega nos mercados internacionais.
Deste xeito, o conselleiro fixo fincapé nas excepcionais calidades do peixe e marisco galegos e na profesionalidade e experiencia do sector como “principais claves do seu éxito” e nesa liña indicou á empresa rianxeira como exemplo, procesando cada ano ao redor de 5.000 toneladas de materia prima. Asemade, eloxiou os esforzos da compañía por innovar e mellorar os seus produtos así como por coidar a súa calidade e seguridade alimentaria cun laboratorio propio de control. Un traballo que lle valeu a súa inclusión no selo de Galicia Calidade.
