A asociación da nosa ocmarca Amicos, ao abeiro do seu compromiso coa inclusión e a igualdade, celebra cun completo programa de actividades este 8M, Día Internacional da Muller. Un dos obxectivos é tirar abaixo as barreiras e discriminación ás que teñen que enfrontarse as mulleres con discapacidade: a de xénero e como persoas con discapacidade. Por este motivo, a asociación deseñou unha semana reivindicativa con todo tipo de accións, materializada polo equipo técnico do Centro de Atención Integral e o Centro de Educación Especial.
A semana comezou con varias sesións informativas nas que se trataron cuestións como a orixe do 8 de marzo como Día da Muller, porqué se utiliza a cor violeta, ou a situación da muller na sociedade. A través destas actividades, buscouse ofrecerlles un contexto ás mozas e mozos que os anime a participar no debate e expresar os seus puntos de vista e as súas dúbidas con respecto ao tema.
Accións lúdicas e creativas para sensibilizar
Asemade, tamén se elaborou a decoración que engalana o centro e varios murais, así como algúns presentes. Un dos murais xirou en torno á sororidade, no que os e as beneficiarias traballaron este concepto e a importancia de crear redes de apoio para fomentar cambios a pequena e gran escala, así como a necesidade de traballar a propia autoestima.
En Xogo as e os participantes traballaron sobre os estereotipos e a violencia de xénero apoiándose no vídeo-libro A princesa que non quería comer perdices. Pola súa banda, no obradoiro de Medioambiente navegaron pola Galería de Mulleres Extraordinarias, ao abeiro da que descubriron o nome e a vida de mulleres que cambiaron a historia. A continuación elaboraron con distintos materiais e técnicas varios retratos de mulleres ilustres como a astronauta Valentina Tereshkova, as activistas Malala Yousafzai e Rosa Parks, a aviadora Amelia Earhart, a artista Frida Kahlo ou a deseñadora Coco Chanel.
Tamén se traballaron conceptos referentes á violencia de xénero e os distintos tipos, a discriminación, a desigualdade na parella… todo a través do conto de Arturo e Clementina. Esta actividade deu pé a un amplo debate sobre os valores e as situacións descritas na narración.
Actividades de sensibilización no Centro de Educación Especial Amicos
Por outra banda, o equipo da área de Pekes elaborou un dosier de actividades e pasatempos, que enviou aos colexios da comarca. O tema principal non é só a figura da muller, senón que está centrado na muller con discapacidade. O obxectivo é que o alumnado de infantil e primaria se achegue ao Día da Muller “dunha forma lúdica e educativa”.
Ademais, o xornal adaptado de CEEPR, Peke News, publicado este mes de marzo, tamén ten como tema central o 8M. E no centro, tanto os técnicos como os nenos e nenas compuxeron un gran mural cos retratos de todas as alumnas e as mulleres do equipo de Pekes. Este mosaico non só está elaborado con fotografías, tamén con outros materiais como la, recortes, etc.
A dobre desigualdade
Amicos lembrou este 8M que as mulleres con discapacidade seguen a sufrir a interseccionalidade dunha discriminación estrutural. Isto é, no seu caso solápanse dous eixes de discriminación, o que “fai a súa situación especialmente delicada”, sinalou a asociación da nosa comarca, engadindo que neste contexto “as nenas e mulleres con discapacidade teñen maior risco de sufrir violencia e abuso”. De feito, segundo o Centro Español de Documentación e Investigación sobre Discapacidade, un 40,4% das mulleres con discapacidade sufriron algún tipo de violencia de mans dalgunha das súas parellas, fronte ao 31,9% de mulleres sen discapacidade.
Pero a desigualdade está presente en todos os aspectos. Así, non só existe unha falta de representación e participación na toma de decisións políticas e sociais: “Se falamos do ámbito laboral, a taxa de presencia activa neste mercado das mulleres con discapacidade é do 35,3% fronte ao 72,8% das mulleres e o 82,6% dos homes sen discapacidade”, explicaron dende Amicos, engadindo que “ademais, as mulleres con discapacidade cobraron no 2020 un 12,5% menos que os seus compañeiros con discapacidade, un 30,9% menos que os homes sen discapacidade”.
