O secretario xeral do PSdeG provincial, Bernardo Fernández Piñeiro, visitou este xoves 15 a a feira de Noia, onde comprometeu a mellora das infraestruturas e a mobilidade do Barbanza fronte a “15 anos de incumprimentos da Xunta do PP”, sinalou, acompañado do voceiro socialista local Fran Pérez e da candidata boirense María Outeiral.
Fernández Piñeiro sinalou que “esta comarca ten moitas necesidades, que levamos trasladando dende o Partido Socialista ao longo destes anos, pero o Partido Popular non escoita ningunha delas”. E engadiu: “Levamos dende hai anos denunciando o pésimo funcionamento do transporte metropolitano, mentres vemos que Alfonso Rueda fai un vídeo indo en autobús polo rural, onde calquera persoa sabe que non hai autobuses froito do seu abandono; vemos como a xente queda tirada nas paradas porque non pasa o bus, porque este está avariado ou porque non hai sitio, mentres a conselleira Ethel Vázquez di que todo está ben”.
Fernández Piñeiro recalcou o compromiso do PSdeG coa veciñanza do Barbanza de “garantir a converxencia da bisbarra co resto de Galicia en materia de mobilidade e infraestruturas, traballando como xa fixemos no anterior goberno bipartito”.
Por outra banda, Fran Pérez destacou que “o Partido Socialista é quen de presentar, ademais dun programa xeral sólido, solucións concretas para as distintas comarcas, facendo propostas como a da modificación da vía que une Noia e Boiro”. Na súa opinión, “esta demanda é compartida por toda a veciñanza da zona, xa que a vía ten uns problemas moi importantes nos que a Deputación leva os últimos anos investindo grandes cantidades de cartos, pero esta non ten recursos suficientes”. Pérez apostou por “transferir a titularidade desta vía á Xunta para dende aí afrontar un proxecto definitivo para esta infraestrutura fundamental”.
María Outeiral sinalou que “outro problema é o do corredor entre Noia e Santiago, que leva 12 anos parado e que aparece ano tras ano nos orzamentos da Xunta sen que se execute nada”. E engadiu: “Están os terreos expropiados e sabemos que se pode facer, e máis ao tratarse dun traxecto moi importante para milleiros de persoas que se trasladan a traballar ou ao médico”.
Outeiral apuntou que “todos osconcellos da comarca levan anos reclamando diferentes infraestruturas, porén, a conselleira Fabiola García prometeu nun mitin hai uns días en Ribeira un novo centro médico en Noia”, afirmou Outeiral, engadindo que “sabemos que é mentira, porque non está nos orzamentos deste ano, é un insulto á veciñanza da comarca”.
