A asociación de empresarios Noia Histórica puxo en marcha a nova edición da súa Campaña de San Valentín. Fíxoo co obxectivo de reivindicar o comercio local de cara á celebración do 14 de febreiro e cunha campaña de “imaxe minimalista” e unha mensaxe sinxela (Quérote) que é un chamamento a sumarnos á conmemoración do Día dos Namorados, estendendo este sentimento e esta fidelidade ao tecido comercial de proximidade. “Na campaña Quérote”, explican dende Noia Histórica, “repartimos entre 70 comercios da vila un cartel ca imaxe da promoción e 2.000 piruletas con forma de corazón para entregar aos clientes polas compras do 14 de febreiro”. A imaxe estará presente tamén nas pantallas dixitais de San Lázaro e Rosalía de Castro. Esta campaña está subvencionada pola Xunta de Galicia.
