Este mes de febreiro deron comezo no Viveiro de Empresas de Ribeira as actividades formativas presenciais do Programa Integrado de Emprego (PIE) promovido pola Administración local e subvencionado pola Consellería de Promoción do Emprego e Igualdade da Xunta de Galicia.
O programa de formación inclúe entre outra cousas dúas edicións cun módulo de informática básica na Aula CeMIT do Concello de Ribeira durante os meses de marzo e abril.
O Concello lembra que as persoas que estean interesadas en ampliar a información, poden achegarse á sede do Programa de Emprego, situada no Viveiro de empresas do Concello de Ribeira (rúa antigo matadoiro) ou ben chamar aos números de teléfono 669150809 – 628557348.
O Programa Integrado de Emprego (PIE) de Ribeira ten o obxectivo de mellorar a empregabilidade da cidadanía por medio de accións complementarias de orientación, formación e intermediación laboral.
“Este programa está dirixido a persoas con discapacidade, en risco de exclusión, mulleres vítimas de violencia de xénero, menores de 30 anos con baixa cualificación e persoas inmigrantes”, explicou recentemente a concelleira de Emprego, Veva Betanzos, engadindo que ao abeiro do programa levaranse a cabo formacións específicas e obradoiros para a busca de emprego, comunicación, habilidades sociais, preparación de entrevistas, emprendemento e mobilidade laboral. Entre as formacións, destacan cursos de inglés para o sector comercio, manipulador de alimentos, animación turística ou preparación e venda de peixe. Tamén, como dixemos, cursos de informática básica.
