Os tesouros ambientais e patrimoniais da parroquia de Baroña, no concello de Porto do Son, volven aparecer na listaxe de mellores areais de España. Unha vez máis, Viajes National Geographic inclúe a praia de Baroña entre as máis destacadas praias do litoral español, praias que segundo definen dende a prestixiosa revista, son paraxes naturais que “brinda felicidade”.
O referido areal sonense, en concreto, figura no segundo posto da clasificación, acompañando os de Oyambre (Cantabria) e Gulpiyuri (Llanes, Asturias) e precedendo a outra praia galega: a das Catedrais (en Ribadeo).
“Os celtas elixiron este lugar como asentamento pola súa beleza e localización estratéxica. Desapareceron, pero os restos do #CastroDeBaroña permaneceron xunto ao mar alleos ao paso do tempo”, sinálase na crónica.
A praia do Castro de Baroña (Arealonga) tamén figurou na dita clasificación os anos 2023 e 2022, tal e como sinalamos dende este medio.
