O Diario Oficial de Galicia (DOG) publica este mércores as 42 listas electorais para as próximas eleccións do 18 de febreiro que enfrontará a un total de 12 partidos, dez deles nas catro circunscricións electorais.
Este total supón unha baixada significativa con respecto a xullo de 2020, cando se presentaron 56 listas en total fronte ás 42 que se rexistraron para estes comicios nas xuntas electorais provinciais correspondentes.
A todas as circunscricións preséntanse: PPdeG, BNG, PSdeG, Sumar Galicia (coalición), Podemos (coalición), Espazo Común Galeguista (coalición), Vox, Pacma, Escanos en Branco e Por un Mundo máis Xusto.
Estas dez listas son as únicas que, así mesmo, se presentan nas provincias da Coruña e de Pontevedra. Desta maneira, as diferenzas prodúcense nas provincias de Lugo e Ourense.
Na provincia de Lugo preséntase, como novidade, Izquierda por Almería, como anunciou en días pasados, mentres que na de Ourense faino Democracia Ourensana (DO), o partido do alcalde da capital, Gonzalo Pérez Jácome.
Con respecto a fai catro anos, unha das novidades é a reorganización do Espazo Común Galeguista, que, por exemplo, agora aglutina a Compromiso por Galicia.
Sumar Galicia e Podemos, por separado, toman a remuda da lista que en 2020 presentou Galicia en Común-Anova Mareas. Podemos, tras votar en contra os inscritos ao acordo con Sumar, preséntase en coalición con Alianza Verde e Recortes Cero.
Democracia Ourensana, que en 2020 non concorreu, faio agora.
