Correos emitiu un comunicado no que informa que está a adoptar “todas as medidas organizativas necesarias para reforzar o servizo en oficinas, distribución e centros loxísticos, de fronte ao correcto desenvolvemento das actividades relacionadas co proceso electoral e o voto por correo para as eleccións autonómicas ao Parlamento de Galicia que se celebrarán o 18 de febreiro”.
En concreto, a empresa reforzará a atención aos cidadáns na súa rede de 2.388 oficinas en toda España, especialmente, nas 166 oficinas de Galicia. Poderanse habilitar portelos exclusivos para eleccións e, se a afluencia así o require, instalaranse no vestíbulo mesas adicionais especificamente destinadas a xestionar o voto por correo.
Ademais, a rede de oficinas dispoñerá de 533 PDAs, 74 delas en Galicia, para axilizar a atención aos clientes nas oficinas con maior afluencia de voto por correo e un empregado encargarase da xestión das colas, atendendo igualmente cunha PDA.
Alén do devandito, potenciarase o uso do sistema de cita previa que xa está a funcionar en 526 oficinas de todo a xeografía estatal, 26 delas en Galicia. Ademais, nas oficinas onde sexa preciso, activarase unha opción no xestor de quendas para “voto por correo”, para priorizar a atención ou canalizala cara a postos específicos, “todo iso para axilizar a atención e reducir as esperas nas oficinas durante o período electoral”, informou a empresa, engadindo que “en canto á rede de distribución contarase con 50 PDAs adicionais, que facilitarán a entrega da documentación electoral, e adaptaranse os roteiros de transporte para a remisión da documentación desde o centro loxístico a todas as unidades de distribución en función das necesidades”.
E tamén se reforzará o servizo en todos os centros loxísticos, incluíndo o Centro de Tratamento Automatizado de Lavacolla (Santiago de Compostela) e o situado no Aeroporto Adolfo Suárez Madrid-Barajas, para a correcta xestión dos envíos internacionais.
Para todo iso, Correos formalizará 450 contratos de reforzo en toda España “para garantir o cumprimento de todas as obrigas de servizo público que lle son encomendadas durante os procesos electorais por ser o operador designado polo Estado para prestar o Servizo Postal Universal”. Estas persoas traballarán atendendo aos cidadáns nas oficinas, repartindo envíos e ocupándose de tarefas loxísticas nos centros afectados.
A xestión do voto por correo inclúe a admisión das solicitudes (por vía telemática ou presencial), a súa entrega nas Delegacións Provinciais da Oficina do Censo Electoral en Galicia, a entrega en man da documentación electoral remitida polo Censo aos solicitantes, así como a admisión do voto por correo e a súa custodia ata a súa entrega durante a xornada electoral nas mesas electorais correspondentes.
Así mesmo, a colaboración de Correos nas eleccións autonómicas ao Parlamento de Galicia esténdese tamén ao reparto das tarxetas censuais e aos envíos de propaganda electoral, ademais das comunicacións a membros das mesas electorais naqueles municipios onde se asinaron acordos, o envío aos concellos da lista do censo, a recollida de documentación o día das eleccións, etc.
Eleccións Galicia: solicitude de voto por correo ata o 8 de febreiro
Os cidadáns que queiran votar por correo nas eleccións autonómicas ao Parlamento de Galicia poden solicitar ata o día 8 de febreiro (inclusive), vía telemática en www.correos.es ou en calquera oficina de Correos de España, o certificado da súa inscrición no Censo Electoral. A obtención deste certificado é requisito imprescindíbel para poder emitir o voto por correspondencia.
O prazo para depositar o voto por correo, segundo o acordo de ampliación adoptado pola Xunta Electoral Central, estenderase ata o 15 de febreiro, no horario habitual de apertura das oficinas de Correos.
