A Casa da Cultura do Concello de Outes vai acoller este domingo, 14 de xaneiro, ás 17 horas, a edición número 13 do Festival Benéfico a favor da Asociación de Persoas con Discapacidade da Bisbarra de Muros (ADISBISMUR).
Todo o persoal laboral e as persoas usuarias do centro que a entidade ten en Valadares participarán no festival.
Neste festival interpretaranse obras de teatro, bailes e cancións nas que participarán tanto as persoas traballadoras como as usuarias do centro que ten a entidade en Valadares.
Ademais, proxectarase un vídeo no que se fai balance de todas as actividades que se desenvolveron no centro durante o ano 2023.
Para levar a cabo este festival a entidade ADISBISMUR conta co apoio do Concello de Outes e con empresas colaboradoras como Gadis, Eroski e Cuevas, ademais de contar coa interpretación do grupo as Jaitas Blue que tocarán diferentes pezas ao longo do festival.
As persoas interesadas en asistir a este festival poden facelo tras contribuír cun donativo de 5 euros que lles dará a oportunidade de entrar nun sorteo dunha cesta.
Para quen non poida asistir este domingo ao festival, terá outra oportunidade o vindeiro domingo, o 21 de xaneiro, no Concello de Mazaricos.
