O Concello de Muros foi este xoves 18 de xaneiro protagonista no pleno do Parlamento Europeo pola súa xestión ante a marea de granulados plásticos que chegan ás praias galegas desde o mes de decembro. Convidada polo grupo dos Verdes e pola eurodiputada Ana Miranda, a alcaldesa de Muros, María Lago, participou antes do pleno nunha reunión co comisario europeo de Medio Ambiente, Océanos e Pesca, o lituano Virginijus Sinkevicius.
“O primeiro é limpar as praias e solucionar a actual crise, pero o comisario manifestounos a necesidade de incrementar os controis sobre o tráfico marítimo de mercadorías como os granulados, co obxectivo de evitar no futuro problemas similares”, explica Lago, engadindo que “tiven ocasión tamén de transmitirlle a necesidade de que as autoridades europeas miren máis e coiden o sector pesqueiro galego, agradecendo a receptividade ás miñas demandas pola súa parte”, engade a alcaldesa.
Muros foi o único concello galego presente no pleno deste xoves, no que se debateu sobre a recente catástrofe ecolóxica en Galicia e sobre os problemas que a contaminación por microplásticos provoca nas localidades costeiras.
Muros foi o primeiro concello de Galicia en pechar coa aseguradora da empresa armadora e coas entidades de voluntariado un plan de limpeza dos pélets de plástico nas praias, que supuxo ademais a contratación de máis de 50 traballadores e traballadoras de Muros.
