O xerente do Consorcio Galego de Servizos de Igualdade e Benestar, Perfecto Rodríguez, destacou este mércores 20 de decembro “o importante aforro de máis de 2.000 euros ao ano que supón para os pais a gratuidade implantada pola Xunta en todas as escolas infantís de Galicia e para o 100% do alumnado”. Díxoo durante unha visita á Escola Infantil de Porto do Son, pertencente á rede pública autonómica. OI xerente aproveitou a visita para repasar co alcalde do concello, José Luis Oujo, as recentes melloras levadas a cabo no centro, entre outras a colocación de novos estores.
Perfecto Rodríguez sinalou que “a través da gratuidade a Xunta pon á disposición das familias que viven nos concellos da comarca do Barbanza máis de 800 prazas de 0 a 3 anos totalmente de balde”. Ao respecto, lembrou que “desta medida benefícianse xa desde o curso pasado todas as escolas da comunidade, con independencia de que a súa titularidade sexa autonómica, municipal, de iniciativa social ou privada”. Tamén fixo saber que o vindeiro ano 2024 a Xunta incrementará nun 9% o orzamento destinado a financiar a gratuidade, ata os 60 millóns de euros, para beneficiar a arredor de 31.000 familias. “Galicia”, dixo, “continúa sendo a única comunidade que oferta atención educativa de balde de 0 a 3 anos oito horas diarias de luns a venres e durante once meses ao ano”.
