O Concello de Porto do Son informou de que está na recta final o prazo de inscrición do II Concurso de Nadal de iluminación exterior de vivendas, no que poden participar todas as persoas veciñas do concello que adobíen o exterior dos seus domicilios situados no termo municipal con iluminación e/ou motivos de Nadal, apreciábeis dende a vía pública.
Haberá premios para as tres mellores propostas: unha cesta de Nadal valorada en 150 euros, unha cesta de Nadal valorada en 100 euros e un lote de Nadal valorado en 50 euros. As inscricións estarán abertas dende o 1 de decembro até este venres 15 de decembro ás 12.00 horas, enviando un vídeo no que se aprecie toda a decoración e a iluminación da vivenda participante á conta de correo culturaportodoson@gmail.com.
O fallo do xurado farase público o 18 de decembro ás 12.00 horas na web e nas redes sociais do Concello.
