A Asociación de Municipios do Camiño a Santiago pola Ría de Muros Noia participa esta semana na quinta edición da feira Fairway, o gran foro de profesionais do Camiño que terá lugar ata o 3 de novembro no Pazo de Congresos e Exposicións de Galicia. A asociación participa cun stand xunto á Asociación de Clubs Náuticos de Galicia (ASNAUGA), a Asociación de Amigos do Camiño da Ría de Muros Noia e Sailway, a única navieira de Galicia que opera no Camiño de Santiago.
A Asociación aproveitará para participar no Workshop organizado por Fairway con preto de corenta recoñecidos hosted buyers, operadores e axencias de viaxes que traballan no Camiño de Santiago a nivel internacional. “Nestas reunións aproveitaremos para presentarlles o catálogo actualizado de empresas e servizos do Camiño a Santiago pola Ría de Muros Noia”, sinalan dende a dirección da asociación, engadindo que o venres 3 de novembro, ás 11:00 horas, o stand acollerá unha asemblea da Asociación de Municipios do Camiño a Santiago pola Ría de Muros Noia; e ás 17:30 horas, unha reunión da Asociación de Amigos do Camiño a Santiago pola Ría de Muros Noia. Durante os tres días haberá proxeccións de vídeos promocionais do Camiño, así como do documental O Camiño esquecido.
Na inauguración (este mércores 1 de novembro), Goretti Sanmartín, no seu dobre cargo como alcaldesa de Santiago e integrante da Asociación de Municipios do Camiño a Santiago pola Ría de Muros Noia, encabezou a comitiva oficial integrada por Xosé Manuel Merelles, director da Axencia de Turismo de Galicia; Antonio Leira, responsábel de Deporte e Xuventude da Deputación da Coruña; Cesáreo González Pardal, presidente do Cluster de Turismo de Galicia; e Miriam Louzao, concelleira de Turismo de Santiago. Unha comitiva que foi recibida por Javier Ruíz de Cortázar, presidente de ASNAUGA e Sebastián Valverde, xerente da Asociación de Municipios do Camiño a Santiago pola Ría de Muros Noia.
