O BNG de Dodro felicita a Anxo Angueira pola súa entrada na RAG

07 Novembro 2023

A entrada na Real Academia Galega de Anxo Angueira (Manselle, Dodro) escritor e profesor, ademais de presidente da Fundación Rosalía de Castro, foi un importante motivo de celebración para o BNG local. O sábado pasado, sen ir máis lonxe, Rosa Blanco e Xoán Mariño, en nome da asemblea municipal do grupo nacionalista, transmitiu persoalmente os parabéns ao novo académico. “Para o noso municipio é unha honra ter na RAG a unha persoa como Anxo, entregada á causa das letras do noso país”, sinalaron, engadindo que “dende a súa profesión, a súa obra literaria ou até o seu labor á fronte da Fundación Rosalía de Castro, seguirá tecendo a bandeira necesaria que arborará tamén na rúa Tabernas da Coruña, na sede da Real Academia Galega”, expresou o portavoz nacionalista Xoán Bautista Mariño. No comunicado o BNG , amais das felicitacións, encargou ao novo académico unha tarefa de gran relevancia: “Sabedores de que seguirá promovendo os valores da lingua e a cultura galega e facéndoa visíbel en todos os eidos, cremos que o Día das Letras Galegas para o noso poeta Eusebio Lorenzo Baleirón está xa máis preto”. De feito, lembran, “aínda non tivo o vate de Laíño un Día das Letras desexado por todo Dodro, dende onde divulgan ano tras ano o máis prestixioso premio de poesía homónimo do país”.

Sobre Anxo Angueira

A Real Academia Galega elixiu novo académico de número o escritor e investigador Anxo Angueira (Dodro, 1961). O profesor da Universidade de Vigo, actual presidente da Fundación Rosalía de Castro, ocupará a vacante producida polo pasamento do poeta Salvador García Bodaño-Zunzunegui o pasado mes de marzo. Na mesma sesión foi nomeado académico de honra Takekazu Asaka (Toquio, 1952), valedor da lingua e da cultura galegas no Xapón.

Anxo Angueira é profesor titular da área de Filoloxías Galega e Portuguesa da Universidade de Vigo e centra os seus estudos na xénese e nas características do Rexurdimento. Autor de traballos como Das copras de Sarmiento ós cantares de Rosalía de Castro. Cara a unha nova periodización do Rexurdimento (2013) ou Rexurdimento: a palabra e a idea (2019), conta cunha intensa e dilatada dedicación á obra de Rosalía de Castro, con achegas que permiten unha lectura anovada e respectuosa coa vontade da autora. Editou Cantares gallegos (2013), Follas novas (2016), En las orillas del Sar (2019) e La flor, A mi madre, poesía dispersa e traducións (2023), publicou diversos artigos e antoloxías sobre a autora fundacional das letras galegas contemporáneas, e preside, dende o ano 2012, a Fundación Rosalía de Castro, na que desenvolve un destacado labor de divulgación da figura e do legado literario da escritora.

Como creador literario, o académico electo é autor de algunhas obras clave das letras galegas recentes, como os poemarios O valo de Manselle (1996), Libro da vertixe (1997) -gañador do Premio Díaz Castro-, Fóra do sagrado (2007) e Palmeiras, piueiros (2021). Como narrador é autor de Bágoas de facer illas (1997), Premio Café Dublín; Pensa nao (1999), novela gañadora do Premio Xerais na que brilla a lingua popular ao servizo dunha auténtica epopea do pobo galego; A morte de A (2003) e Iria (2012). Cultiva tamén o articulismo, na actualidade cunha colaboración mensual en Nós Diario.

Outros artigos

A Pobra prende as luces de Nadal

Numerosa veciñanza achegouse na tarde deste 2 de decembro á praza Alcalde Segundo Durán para asistir ao acto de acendemento do alumeamento do Nadal. Foi un evento organizado pola Concellaría dos Servizos Municipais. Animadas pola charanga Xuntanza e cun dos elfos de...

+

Domingo con alerta laranxa nas rias baixas desde as 15 horas

Unha borrasca ao nordés de Galicia pon en alerta por forte vento ao litoral este domingo A presenza dunha borrasca ao noroeste de Galicia deixará forte vento no mar este domingo, con intervalos de forza 8 entre A Guarda e Sisargas. En terra espéranse refachos...

+

Publicidade

Revista en papel

Opinión

“Amor se escribe con H intercalada, Ahmor”. Manuel Dominguez

“Amor se escribe con H intercalada, Ahmor”. Manuel Dominguez

Me explico, si pronuncias amor, como habitualmente, nada ocurre, pero, si pronuncias amor con h, entonces tienes que inspirar aire, actúas con el diafragma, inhalas e inhalando aire, es el sentimiento del amor. Ese suspiro que causa la h del amor, es único. Me gusta...