O dono da gastrocervecería Penín de Ribeira resultou afectado por unha intoxicación de fume ao apagar o incendio que ocorreu na cociña do establecemento pouco despois das 18.00 horas.
O home, afectado polo fume provocado, foi trasladado en ambulancia polo persoal do Servizo de Urxencias Sanitarias de Galicia-061
Ao parecer, sufriu queimaduras nun dos seus brazos. Foi atendido no lugar por persoal médico e logo trasladado en ambulancia. O lume orixinouse na freidora e foron os xerentes do negocio quen logrou extinguir as chamas. Ademais, sacaron a bombona ao exterior para reducir os riscos.
Acudiron ao punto, tras ser informados polo 112 Galicia, os Bombeiros de Boiro, os membros de Protección Civil municipais e da Agrupación de Voluntarios de Protección Civil de Ribeira e a Policía Local. Tamén foron informados os axentes da Policía Nacional e o persoal do Servizo de Urxencias Sanitarias de Galicia-061.
Unha vez no lugar, os Bombeiros comunicaron que o lume xa fora extinguido e ían a proceder, xunto cos membros de Protección Civil, coas tarefas de ventilación. Ardeu unha frixideira.
Así mesmo, o persoal sanitario confirmou o traslado do ferido ao Hospital do Barbanza.
A Policía Local de Ribeira pechou os dous accesos para peóns que conectan a praza de Vigo coa rúa Galicia e o Malecón. Tamén acudiron axentes da Policía Nacional. Debido á falta de persoal no parque de bombeiros de Ribeira para cubrir os servizos mínimos, foi necesario mobilizar ao GAEM e aos bombeiros do parque de Boiro.
