O delegado da Xunta, Gonzalo Trenor, acompañado polo alcalde de Dodro, Xavier Castro, supervisou os días pasados o resultado das obras de rehabilitación do CPI Eusebio Lorenzo Baleirón. As obras, que están case rematadas, implicaron un investimento de 1,4 millón de euros. A actuación, materializada a raíz dunha demanda da Unión Veciñal de Dodro e impulsada polo Concello e o Goberno galego, supuxo a rehabilitación integral de todo o edificio.
O obxectivo final foi “mellorar a eficiencia enerxética e a comodidade dos usuarios”. En termos máis concretos, renovouse toda a envolvente do edificio que inclúe desde as fachadas, ás cubertas ou a carpintería. Substituíronse tamén todas as luminarias e habilitáronse novas ramplas e pasamáns coa finalidade de mellorar a accesibilidade.
Segundo explicaron, na actualidade estase rematando coa construción dunha pérgola na zona de acceso que substitúe a existente entre o edificio de primaria e secundaria. A obra tamén contempla actuacións no interior do inmóbel, coa reforma dos aseos de primaria e coa renovación da biblioteca actuando para que os espazos sexan máis iluminados e ventilados e renovando o chan.
Toda a obra encaixa no Plan de Nova Arquitectura Pedagóxica da Xunta de Galicia que, segundo sinalou Trenor, ten como “obxectivo principal impulsar novos espazos escolares máis innovadores, sustentábeis e confortábeis, acordes cos novos retos de futuro da educación”.
