O arquitecto David Chipperfield, gañador do Premio Pritzker de Arquitectura 2023, visitou Compostela este mércores 8 de novembro no marco do programa ConCiencia, dirixido polo catedrático da USC, investigador, escritor e divulgador Jorge Mira. Na súa estadía, Chipperfield mantivo un encontro aberto coa cidadanía que se desenvolveu no Centro Galego de Arte Contemporánea, o CGAC. Previamente tivo oportunidade de departir coa alcaldesa Goretti Sanmartín nun encontro institucional no Concello, e tamén coa comunidade da USC nun relatorio no Colexio de San Xerome. Como lembraremos, Chipperfield é un prestixioso arquitecto e urbanista inglés afincado en Corrubedo (Ribeira), onde está a sede principal da Fundación RIA, impulsada por el mesmo co obxectivo principal de “recuperar a rica tradición construtiva do Barbanza e da súa contorna, así como a súa estreita relación ancestral coa natureza e a paisaxe”.
Aposta polo sustentábel e pola posta en valor do patrimonio
Na súa estadía en Santiago, Chipperfield apostou por un futuro onde se “integre a sustentabilidade a través da reutilización de edificios, o cal é sempre mellor que construír outros novos”, afirmou no encontro que mantivo este mércores 8 cos medios de comunicación no Colexio de San Xerome.
O arquitecto recoñeceu que ve en Galicia “todo un referente nese modelo de progreso sustentábel” e reflexionou sobre como “é posíbel que nun contexto no que a economía non é tan potente como noutros países do mundo, a poboación acade tan boa calidade de vida”. E engadiu: “Se cadra non estamos tan atrás e talvez Galicia teña moito que ensinar”. A restauración do Bar do Porto, en Corrubedo, ao que Chipperfield deu unha nova vida, é emblema do que o premio Pritzker entende como a razón de ser da arquitectura. “Unha vila é algo físico pero tamén se trata dunha entidade social”, dixo. “A arquitectura fortalece a actividade social da comunidade”, afirmou. “A rúa é algo social, representa a comunidade e o bar tamén representa a comunidade”, dixo.
Como dixemos, Chipperfield visitou Compostela no marco do programa de divulgación da USC e do Consorcio de Santiago ConCiencia, dirixido polo catedrático Jorge Mira, quen tamén o acompañou durante a rolda de prensa xunto a Manuel Rodríguez, xerente da Fundación RIA. Antes de atender os medios, Chipperfield mantivo unha xuntanza co reitor Antonio López e asinou no Libro de Honra da Universidade. A continuación, dirixiuse ao Concello de Santiago, onde foi recibido pola alcaldesa Goretti Sanmartín.
Ademais, Santiago acolleu este mércores en primicia proxección da versión abreviada do documental do Premio Pritzker 2023 a David Chipperfield. O acto desenvolveuse no Centro Galego de Arte Contemporánea. A peza audiovisual inclúe imaxes exclusivas da cerimonia de entrega do premio, que tivo lugar na Ágora Antiga de Atenas en maio de 2023, intercaladas con comentarios sobre a súa obra a cargo de anteriores galardoados e membros do xurado.
Biografía
David Chipperfield estudou arquitectura na Kingston School of Art e na Architectural Association School of Architecture de Londres antes de fundar o seu propio estudio en 1985. Creou unha metodoloxía de deseño que agora se utiliza en cinco oficinas de Londres, Berlín, Milán, Shanghai e Santiago de Compostela. Amais, é membro do Royal Institute of British Architects e integrante honorario do American Institute of Architects e do Bund Deutscher Architekten. Entre os recoñecementos que recibiu están a Orde do Mérito da República Federal de Alemaña, concedida en 2009, e o título de cabaleiro polos servizos prestados á arquitectura no Reino Unido e Alemaña, concedido en 2010. En 2011 recibiu a Real Medalla de Oro de Arquitectura do RIBA e, en 2013, o Praemium Imperiale da Asociación de Arte de Xapón, ambos os dous en recoñecemento ao seu labor ao longo de toda a súa carreira. En 2021 foi nomeado membro da Order of the Companions of Honour polos servizos á arquitectura, e en 2023 foi galardoado co Premio Pritzker de Arquitectura.
Ademais do seu traballo de deseño arquitectónico, David Chipperfield impartiu clases e deu conferencias en escolas de arquitectura de todo o mundo. En 2012 comisariou a 13ª Exposición Internacional de Arquitectura da Bienal de Venecia baixo o título Common Ground. Foi o mentor de arquitectura entre 2016 e 17 para a iniciativa Rolex Mentor and Protégé Arts. En 2017 fundou a Fundación RIA, unha entidade privada sen ánimo de lucro que traballa polo desenvolvemento económico, ambiental e cultural en Galicia.
Entre os anos 2006 e 2022, máis dunha trintena de premios Nobel aterraron na USC grazas ao programa ConCiencia que a institución compostelá desenvolve de xeito conxunto co Consorcio de Santiago. Este programa de divulgación científica procura non só a proxección da cidade de Compostela como foco universal do pensamento, senón que tamén serve de ponte para o reforzamento de contactos científicos entre líderes da máxima relevancia científica mundial e o corpo de investigadores e investigadoras da USC.
