O delegado da Xunta, Gonzalo Trenor, participou este mércores 29 de novembro na entrega de catro desfibriladores externos semiautomáticos destinados a reforzar o material dos servizos de emerxencias municipais. Segundo sinalou Trenor, con esta cesión complétanse as dotacións solicitadas polos concellos de menos de 20.000 habitantes que conten con Agrupacións de Voluntarios de Protección Civil (AVPC). Os catros equipos entregáronse aos concellos de Negreira, Santa Comba, Muros e Pobra do Caramiñal.
O equipamento entregado inclúe un desfibrilador externo cun mínimo de dous xogos de parches de electrodos, un xogo de dúas baterías, cable de conexión a porto USB, kit de reanimación cardio-pulmonar e mochila impermeable.
Segundo explicou Trenor, o DESA é un aparello electrónico portátil “sinxelo de manexar que identifica e trata a parada respiratoria”. A súa efectividade, engadiu, “radica na identificación automática da fibrilación ventricular ou a unha taquicardia ventricular sen pulso restablecendo un ritmo cardíaco efectivo electricamente; ademais é moi eficaz para a maior parte dos chamados paros cardíacos, que na súa maior parte son debidos a que o corazón fibrila e o seu ritmo non é o adecuado, estes equipos basicamente devolven o ritmo adecuado ao corazón”.
A Xunta dota así ás AVPC dun recurso para actuar dunha maneira coordinada cos profesionais do 061, conseguindo gañar tempo na atención ante unha parada cardíaca, ao intentar que o paciente aguante á chegada dos servizos profesionais.