A Sala Arcos Moldes do Auditorio acolle este sábado 7 de outubro, ás 20.30 horas, a representación da función Fátum, a cargo de O Catre Teatro. Trátase dun espectáculo teatral argallado polo polo grupo de teatro local Airiños, que cumpre en 2023 o seu 90 aniversario, ao abeiro do programa Rede Cultural da Deputación da Coruña coa colaboración do Concello de Rianxo. A entrada será de balde até completar a capacidade.
A obra, galardoada no certame de teatro amador Terras do Orcellón do Carballiño, achega ao público adulto a un debate histórico da humanidade: se a vida é un conxunto de accións fortuítas, casuais e ao azar ou se se rexe por un destino escrito e imposíbel de mudar.
Sinopse
Fàtum, o fado, o destino… o que está escrito. A humanidade debate dende o seu nacemento se a vida é un conxunto de accións fortuítas, casuais, ao azar, ou está rexida polo destino, inmutábel e escrito dende sempre.
Se o destino rexe as nosas vidas, quen vela polas persoas? As Nornas, personaxes antigas que acompañan á humanidade dende o principio dos tempos. Sempre alí, canda nós en todo momento, observando e supervisando, rutineiras e eficaces, facendo o que se agarda delas… porque todo está escrito. Ou non? E se houbese un trío de Nornas que desexase facer outra cousa, ser diferentes, cambiar o seu destino?
Esta é a historia que conta Fàtum
