Este xoves 25 de outubro comeza en Rianxo un ciclo de faladoiros de AGADEA Alzhéimer destinados a divulgar mecanismos e metodoloxías para achegar maior calidade de vida ás persoas con deterioro cognitivo e ás súas familias. O ciclo desenvolverase ao longo dos meses de outubro, novembro e decembro nas parroquias do concello. O primeiro terá lugar na Casa da República de Isorna e tratará sobre o apoio psicolóxico para persoas coidadoras de persoas con alzhéimer e outras demencias. Celebrarase de 17.00 a 19.00 horas e será impartido pola psicoxerontóloga Alba Iglesias Aldrey. Os faladoiros están abertos á participación de quen o desexe, aínda que se agradece a inscrición previa a efectos dunha mellor organización.
A seguinte cita será o martes 7 de novembro, no Centro Social da Atalaia (Asados), e tratará sobre coidados en pacientes inmobilizados (prevención de úlceras por presión e lesións asociadas á humidade). Será impartida por Ana Calvo (de 17.00 a 21.00 horas), enfermeira do SERGAS.
O martes 21 de novembro chegará a seguinte xornada, da man de Miguel Ángel Gómez, experto en xestión de intelixencia emocional. Desenvolverase a partir das 17.00 horas e tratará sobre como poñernos na pel e na mente dunha persoa con alzhéimer.
En decembro proseguirán as actividades de divulgación cunha xornada sobre a eficacia da terapia ocupacional entre pacientes de alzhéimer (o día 5 de decembro no Centro Sociocultural Vicente Vidal de Leiro, impartida por Irene Vilas, terapeuta ocupacional de AGADEA) e cun encontro de divulgación e formación arredor das vantaxes da fisioterapia para persoas con alzhéimer (no Centro Cultural de Taragoña, coa presenza de Adriana Curros Amboage, fisioterapeuta de AGADEA).
