O Concello de Rianxo presentou a oferta deportiva para a tempada de Inverno 2023/24, incluíndo as organizadas de xeito directo polo Servizo de Deportes, as escolas de formación dos clubs cos que colabora o Concello (programa deporte base) e as propostas da Piscina Municipal.
Trátase, sinalou a Área de Deportes municipal, “dunha oferta que chega a un amplo rango da poboación e ten un carácter descentralizado, con propostas en todas as parroquias rianxeiras, co obxecto de achegar o deporte a todos/as, en especial a aqueles que mais dificultades teñen de mobilidade (crianzas e terceira idade). Non hai límite de prazas en todos os grupos.
-Ás actividades para a rapazada son modalidades deportivas que se pode acceder nos pavillóns municipais (Iniciación deportiva e 3 escolas deportivas: tenis, patinaxe, patinaxe artístico), na Piscina Municipal e a través das escolas de formación dos clubs rianxeiros (9 modalidades: rugby (novidade), piragüismo, remo, Tríatlon, baloncesto, xadrez, voleibol, fútbol e deportes de combate)
-En canto ás actividades adultos e terceira idade, as persoas interesadas poderán escoller entre 20 propotas distintas, que van desde omultifitness e o tenis nos pavillóns municipais a unha ampla oferta de actividades acuáticas (pool dance, pool salus…) e dirixidas (cross, pilates, step, hipopresivos…) na Piscina Municipal.
-Asemade, mantéñense os grupos de ximnasia para a terceira Idade en todas as parroquias do
concello.
O prazo de inscrición abriu o 21 de setembro e as actividades darán comezo o 2 de outubro. No Pavillón Polideportivo de Rianxo, por mor das obras de substitución da cuberta comezan cando rematen as mesmas. Máis nformación e inscricións no Servizo de Deportes e nos Pavillóns Municipais.
