Luís Pérez Barral, alcalde de Ribeira, Cruz Rivadulla, concelleira de Educación e e Vicente Mariño, concelleiro de Servizos Sociais, mantiveron este luns 18 de setembro unha reunión coas Asociacións de Nais e Pais de Alumnado (ANPAs) con presenza no municipio para abordar as necesidades dos centros e do alumnado no curso escolar 23/24.
No encontro tratáronse diversos temas como o mantemento dos centros educativos.
O Concello explicou que “nos casos nos que a infraestrutura depende da Consellería” elaborará un informe técnico para solicitar as melloras correspondentes que demanda a comunidade escolar.
No tocante ao transporte público, coincidiron en que “as liñas actuais de autobús non se adaptan ao volume do alumnado nin ás súas necesidades”. E engadiron os representantes do Goberno local: “Imos solicitar á Xunta unha reestruturación do transporte público porque é preciso adaptar as rutas e horarios de xeito que fagan servizo aos rapaces e rapazas de tódalas parroquias”.
Ademais disto, o rexedor ribeirense comprometeuse a dar instrucións á Policía Local para que os axentes verifiquen o cumprimento dos horarios e os servizos que a empresa ten encomendados.
Durante a reunión tamén se falou da actual carencia de profesorado para o alumnado con necesidades especiais. “A Consellería precisa axilizar os diagnósticos dos nenos e nenas e reforzar o persoal de pedagoxía terapéutica e audición e linguaxe para garantir unha boa atención ao alumnado”, explicou a concelleira de educación, Cruz Rivadulla.
O Executivo local comprometeuse a trasladar á Consellería de Educación tódalas peticións relacionadas co transporte escolar e a falta de profesorado coa finalidade de mellorar o ensino público no Concello.
Por último, o rexedor informou ás ANPAs de que as subvencións atrasadas que o Goberno anterior non pagara (segundo dixo, as correspondentes aos anos 2018, 2019 e 2021) levaranse a pleno este mes para proceder ao seu abono, así como a convocatoria das seguintes 2022 e 2023.