O BNG de Rianxo trasladou ao Parlamento de Galicia, a través da súa representante, a pobrense Rosana Pérez a preocupación dos nacionalistas respecto das obras que se están a realizar no Colexio Castelao e que se ben foron valoradas “moi positivamente nun principio”, explican, “non recollen a totalidade da problemática do centro escolar despois de cincuenta anos de vida.
Segundo engaden, os traballos estanse a realizar a demanda do conxunto da comunidade escolar, os grupos da anterior Corporación e por iniciativa da Consellería de Educación no marco dos programas do mecanismo de recuperación e resiliencia da Unión Europea, o Plan de Recuperación, Transformación e Resiliencia financiado pola Unión Europea- Next Generation EU. Son, sinalan dende o BNG, obras que levan “o paraugas mediático dunha chamada Nova Arquitectura Pedagóxica”, cun importe que rolda o millón de euros pero que “vemos que non inclúen as seguintes actuacións de importancia e de calado dentro do que debería ser esa nova arquitectura no que atinxe ao centro rianxeiro perdendo unha oportunidade”, apuntan.
Actuacións demandadas polo BNG
“En primeiro lugar actuacións para resolver os problemas de accesibilidade nos dous edificios que o
compoñen. Ningún conta con elevadores, polo que se dificulta o acceso e mobilidade das persoas
con mobilidade reducida. Unha das grandes eivas do proxecto que polo de agora inexplicábelmente
non se resolve”, sinalan.
“En segundo lugar buscábase habilitar da antiga vivenda de conserxería para instalar as oficinas
administrativas e potenciar a ampliación da biblioteca escolar que fica pequena para o amplo
alunado do colexio”, engaden.
En terceiro lugar, apuntan dende o BNG, “non se trocan as luminarias nin a vella caldeira de gasóleo perdendo unha oportunidade de mellorar a eficiencia enerxética do edificio globalmente, unha esixencia acorde cos tempos que vivimos”.
Tamén poñen o foco no peche exterior: “Necesítase a substitución do peche actual para mellorar a
seguridade do centro educativo e para conseguir unha solución integrada co entorno e co propio
centro escolar”.
O BNG di tamén que se ben algunhas das actuacións demandadas aparecían indicadas no proxecto de
Rehabilitación Integral do C.E.I.P. Castelao, “non foron incluídas finalmente no programa de actuación”. Tamén, engaden, “descoñecemtos se haberá unha segunda fase e neste senso cando se prevé acometer”.
