O alcalde de Rianxo, Julián Bustelo, e os membros da Asociación Cabalar De Ruta en Ruta presentaron esta semana os detalles da xuntanza cabalar que se celebra este sábado 30 en Rianxo, e na que está previsto que participen máis de 300 persoas percorrendo a cabalo distintos puntos do municipio rianxeiro. O rexedor salientou “a importancia de eventos destas características que atraen a Rianxo a persoas chegadas de diferentes puntos de Galicia e que se converten en embaixadoras de Rianxo”. O percorrido será de arredor de 21 quilómetros e trazará un itinerario íntegro polo concello pasando por puntos de especial interese como por exemplo o miradoiro de Castro Barbudo.
