A nova xunta directiva da Asociación Rianxeira de Empresarios (ARE) mantivo esta semana a súa primeira reunión presidida pola súa presidenta, Conchi Martínez Quintáns, proclamada na asemblea xeral do pasado 4 de setembro.
Nesta primeira reunión, celebrada o pasado mércores 27 de setembro, a xunta directiva mergullouse en diversos temas clave relacionados co futuro da ARE e a comunidade empresarial local. Como integrantes desta comunidade, os membros da nova directiva recoñeceron “estar firmemente concienciados e comprometidos da necesidade de colaboración con tódolos negocios locais para fortalecer o tecido empresarial e favorecer o seu desenvolvemento económico”.
Entre os puntos tratados nesta reunión, destacan a revisión do estado do programa anual de actividades que se está a desenvolver, con especial énfase nas actividades previstas para este último trimestre do ano. Ademais, comezouse a perfilar o programa de actividades para o 2024 coa achega de diversas ideas destinadas a “conformar un programa dinámico e participativo no que se pretende colaborar con todo tipo de entidades asociativas da vila”, explicaron.
Tamén engadiron que a composición da nova xunta directiva da ARE reflicte “a diversidade do empresariado local” e inclúe “representantes de diversos sectores, uns con décadas de experiencia e outros profesionais máis novos que traen novas ideas e perspectivas para impulsar o futuro dos negocios locais”.
Presidenta: Conchi Martínez (Café Bar O Costillar)
Vicepresidente: Adrián García (tenda de moda A Moreniña)
Secretaria: Cristina Muñiz (asesora financeira)
Tesoureiro: Francisco J. Alcalde (Bandín Audio).
Vogais: Martín Rañó (Rotularama), Jose Manuel Regueira (Regueira Vázquez Asesores e Manuel
Regueira Vázquez SL) e Raquel Figueira (Bar Nova Era).
En nome da xunta directiva da ARE, Conchi Martínez quixo transmitir unha mensaxe a toda a comunidade empresarial de Rianxo: “Estamos aquí para escoitarvos, para apoiarvos e para traballar xuntos na consecución dos nosos obxectivos empresarias. Aos socios da ARE anímovos a facernos chegar as vosas inquedanzas, problemas e necesidades, así como tamén calquera proposta e idea que creades de interese”.
Ademais, aproveitou para convidar a todas as empresas locais que aínda non son socias da ARE a unirse á patronal rianxeira: “Coa vosa unión non só fortalecedes a unidade empresarial da nosa vila senón que tamén teredes a oportunidade de influír directamente no futuro desta e de Rianxo”.
