O Consello de la Xunta deu luz verde a un novo decreto sobre a normativa da sanidade mortuoria en Galicia que, entre outras novidades, reduce de 24 a 12 horas o tempo mínimo de espera para enterrar a un falecido e autoriza o enterramento sen cadaleito, algo que reclamaban as comunidades relixiosas musulmá e xudía.
Este documento substituirá ao decreto 151/2014 e, explicou a Xunta, “mellorará aspectos da regulación para adaptalos aos requirimentos sociais e técnicos existentes”, simplificando as tramitacións e incorporando determinacións da guía consensuada no Sistema Nacional de Saúde.
Segundo o presidente da Xunta, Alfonso Rueda, unha das novidades deste documento é que ampara o enterramento sen féretro por motivos de confesionalidade, algo vetado ata o de agora en Galicia. Con iso, destacou, permitirase a realización de ritos como o musulmán ou o xudeu, que non empregan cadaleito xa que implican que o corpo estea en contacto coa terra.
O proceso será previa demanda e de conformidade coa entidade titular do cemiterio no que se vaia a inhumar o falecido. Conlevará, dixo Rueda, unha maior aplicación do dereito á liberdade relixiosa e a posibilidade de que estes crentes non se vexan obrigados a irse fóra da comunidade para realizar os enterramentos dos seus falecidos.
O conselleiro de Sanidade, Julio García Comesaña, reuniuse precisamente este mércores cos representantes da comunidade islámica en Galicia para informarlles da aprobación deste documento.
O novo decreto tamén inclúe unha modificación dos tempos mínimos esixidos desde o falecemento para poder realizar prácticas sanitarias sobre o cadáver, así como a redución a 12 horas do prazo mínimo para enterrar ou cremar o cadáver, un período que agora era de 24 horas.
A nova regulación tamén dá resposta á “necesidade de reducir o control administrativo preexistente”, optando por unha “intervención máis limitada”, centrada nos aspectos exclusivamente sanitarios do feito.
