O Concello de Outes adiantou detalles sobre o vindeiro curso da súa Escola de Música e Baile Tradicional, que porá o foco, neste inicio de ano académico, en mostrar instalacións, estudos e profesorado ante a veciñanza. Os detalles foron achegados por Anxo Núñez, tenente alcalde de Outes e concelleiro de Cultura, Suso Vaamonde, mestre de música tradicional, e María Mayo, mestra de baile tradicional. Podemos ver as declaracións no vídeo habilitado dende a Área de Cultura do Concello.
Segundo fan saber, a Escola Municipal de Música e Baile Tradicional do Concello de Outes iniciará o novo curso cun mes de portas abertas para toda a cidadanía que teña interese en participar e aprender.
A EMBTO imparte clases de instrumentos tradicionais: gaita, requinta, ocarina, zanfona, acordeón, frautín, e todo tipo de de percusión tradicional: tambor, bombo, pandeireta, pandeiro, pandeira, lata, cunchas, charrasco.
Os venres 1, 8 e 22 de setembro a EMBTO terá as súas portas abertas de 17 a 23 no colexio de Cruceiro de Roo. En baile tradicional os adultos terán horario os venres de 18 a 19, os maiores os sábados de 15:30 a 16:15 e os nenos tamén os sábados de 16:15 a 17:00.
Tamén indicaron que ao longo deste curso o Concello abrirá tamén un proceso participativo para que os participantes da EMBTO acheguen as súas propostas para ter un nome de agrupación “máis recoñecíbel que o acrónimo actual”.
As inscricións entregaranse no concello e poderanse cubrir alí mesmo ou no colexio cos mestres.
As actuacións pendentes da EMBTO están programadas para as 20:30 o venres 29 en Valadares, na véspera das festas de San Miguel, e o venres 15 no Freixo.
A EMBTO tamén conta cun fondo de instrumentos de propiedade municipal que se prestan aos usuarios que así o soliciten. Deste xeito, todas aquelas persoas que se estean iniciando no mundo da música non teñen necesidade de mercar un instrumento precipitadamente, indicaron na presentación do novo curso.
