O pasado día 4 de xullo o alumnado-traballador do Obradoiro Dual de Emprego Pazo de Rianxiño, acompañado de membros do equipo docente e de apoio, realizou unha visita didáctica ao Festival Internacional de Xardíns de Allariz.
A actividade encadrouse na axenda do Certificado de Profesionalidade AGAO0208 (Instalación e mantemento de xardíns e zonas verdes) que se está a impartir nestes intres a 15 persoas do concello de Rianxo, unha axenda que inclúe visitas a espazos axardinados nos que se poidan apreciar persoalmente os contidos desenvolvidos nas materias estudadas.
A celebración do Festival Internacional de Xardíns de Allariz na súa XIII edición ofrece a oportunidade de coñecer, nunha soa xornada, unha colección de creacións que son mostra das tendencias conceptuais, ademais da utilización de novos recursos técnicos e de diversos materiais tanto inertes como vexetais.
