Dende este sábado 1 de xullo o Centro Cultural Lustres Rivas dá cabida a unha nova exposición da artista ribeirense Carmen Sampedro. Trátase de Ecléctica. Serie INA, unha mostra de pintura e poesía cuxa apertura contou coas intervencións do alcalde en funcións, Manuel Ruiz, e da propia autora.
Logo de ter experimentado en anteriores ocasións por un variado inventario de xéneros e fórmulas, a autora decántase nesta mostra polo monopolio exclusivo do óleo. Ademais, compón a proposta un libro poético con dez poesías da autora, de tal xeito que a sonoridade da palabra irrompe e completa a expresividade das imaxes.
Estará aberta ata o 29 de xullo de luns a venres de 10 a 14 e de 19 a 21 horas e os sábados de 10 a 14 horas. A entrada é gratuíta.
Carmen Sampedro (Ribeira, 1956) é mestra de formación, estando actualmente xubilada. Expuxo por primeira vez en Malpica no 2013. En 2019 obtivo o primeiro premio do Concurso de Pintura e Poesía en el Camino, na Estrada, e no 2021 alcanzou o segundo premio no mesmo certame.
Ata o de agora Sampedro ten participado en 80 exposicións colectivas e 11 individuais.
É membro activo do colectivo Galeoska (Galegos e galegas Koa Arte).
